Slach de krante iepen, sjoch op it ynternet. Knibbelje foar JwdV fan de Kulturele Haadstêd is yn Fryslân de nijste trend. Dat it is gefaarlik yn Fryslân! Want dêr’t knibbele wurdt is men jins libben net feilich. Foarearst noch yn figuerlike sin, Mar sa’n AdV, dichter en sjoernalist, ferkeart as knibbeler al op it rântsje, hy hoecht noch mar in lyts triuwke of hy slacht der op. Elkenien dy’t him kritysk uteret oangeande it idee fan de Kulturele Haadstêd en it gedoch (polityk en organisatoarysk) deromhinne wurdt troch him weiset en útracht. Hy giet net yn op wat nei foaren brocht wurdt, want dat docht der net ta. Hy hat it idee fan de Kulturele Haadstêd foar syn eigen karke spand, en ja, dan hâldt it op fansels. Abe is de Kulturele Haadstêd, Abe is Fryslân dat himsels op ’e nij útfine moat, Abe is Fryslân dat de eagen en de finsters ris iependwaan moat.
En wat te tinken fan BL fan Tresoar en fan LC-sjoernalist WJ de sprekbuis fan Bert en fan de LC dy’t dat mar gewurde lit. Nei goed twa jier lijen wurdt Fryslân ynienen mei in media-offensyf konfrontearre. Dat is fertocht en benammen as it in media-offensyf is dêr’t werklik gjin wurd by sein wurdt, dat net as in tange op in baarch slacht. Nim BL. Neffens him soene de Friezen nei 1951 (nei Kneppelfreed) ‘kiezen voor een toekomst die gebaseerd is op een agrarisch-arcadisch en ééntalig Fries ideaal.’ En: ‘Zoektocht naar eigen dna is de kracht van Friesland’ en ‘Friesland op naar Europese toekomst.’ BL hat fan JWdV in slach mei de moalpûde hân, want hy soe om lyk, en dat woe er wol.
JWdV hat harsels en de Fryske polityk wiismakke dat de provinsje Kulturele Haadstêd fan Europa wurde koe. Of miskien wie se der wol wis fan dat it net koe, mar hat se allinne mar in paad folge om Ljouwert der by einsluten ynlúzje te kinnen.
En se hat har oangeande Fryslân en de Friezen wat yn ’e holle helle. Nee, dat hat se net. Se hat nei harsels sjoen, harsels feroardiele en út frustraasje ús doe ek – o dy ellindige selshaat -: Fryslân en de Friezen sjogge allinne nei binnen.
Har slippedragers AdV en BL rinne as wiere masogisten wolberekkene achter har oan.
JwdV, AdV en BL en alle oaren dy’t as hea om ’e skûte om JWdV hinne hingje ha mar ien doel: harsels nei de bedelte helpe. En my!