It begjint al mei de titel fan it projekt: ‘10 books from Friesland’. De offisjele namme fan de provinsje is Fryslân. Mar kin men oars ferwachtsje fan in organisaasje dy’t it yn de Nederlânske fariant oer ‘10 books from Holland’ hat? Soks is tekenjend foar de blykbere sleauwens en maklikens dêr’t it Buchmesse-projekt mei útfierd wurden is.

Ut dy reden hat it oars sa sympatike inisjatyf fan de provinsje Fryslân net de glâns en blâns krigen dy’t it fertsjinne. Namste spitiger om’t wy foar’t neist mar ien kâns krije, en ek dêrom is it net ferwûnderlik dat it meastepart fan de Fryske skriuwers protest tsjin de gong fan saken oantekene hat. Op in te let tydstip, dat wol. Mar earder koe ek net, want doe’t dúdllik waard dat de troch it Letterenfonds oanstelde yntindant ek – en allinne! – ferantwurdlik wie foar de kar fan de titels, wie alles al beslikke en yn kalk en semint getten.

It bliuwt in nuver gegeven dat ynstânsjes dy’t yn namme de belangen fan de literatuer hjitte te behertigjen – en harren bestean dêroan ûntliene – de produsinten fan dyselde literatuer stelselmjittich oer de kop sjogge en op in reginteske wize negearje. Dat it risseltaat fan sok hanneljen opskuor jout is evidint. Dat sok opskuor arrogant ôfdien wurdt ek.

Hjirûnder is te lêzen hoe’t de kommunikaasje tusken de protestearjende skriuwers en de ferantwurdlike ynstânsjes ferrûn is. Dêr moat oan taheakke wurde dat bewust it oantaasten fan de roman Leafdedea fan Homme Eernstma bûten de diskusje hâlden is: yn de earste oanrin gie it ús om de strukturearring fan dit ûndernimmen. Lykwols is by dit oersjoch ek omtinken foar de grouwélige skeining dy’t it boek ûndergien hat om yn dy foarm op de list te kommen. Dat is bûten alle roai en noch mar wer ris in flater op de list fan 10 books from Friesland.

Klik hjir om fierder te lêzen (pdf).

It programma Nei Frankfurt!, nei oanlieding fan de Fryske bydrage oan de de Frankfurter Buchmesse, wurdt hâlden op 27-09-13 yn Tresoar. Sjoch hjir foar mear ynformaasje.