1.
Wylst hjir yn Fryslân it keatsen, fierljeppen en skûtsjesilen al wer los binne, krige ik fia Twitter in foto fan in lyts laachje snie op in auto ûnder eagen. De persoan dy’t de foto makke, die har beklach oer dy snie. Se ha yn Winnipeg, want dêr is de plaat sketten, no al in healjier te krijen mei tige kâld winterwaar, dat mar net wike wol foar de maitiid.
En ik sil jim sizze dat ik wol sa stjonkend jaloersk wie doe’t ik dat lies en dat laachje snie lizze seach. De lêste wike fan febrewaris (!) ha ik de meanmasine al út it fet helle en sûnt dy tiid hat er net in wike mear stilstien. As je der fanút geane dat neffens de histoarje fan de ôfrûne jierren it gers oant begjin desimber ta waakst, komt in groeiseizoen fan it hiele jier rûn aardich tichtby. Dat soks relatyf is blykt wol út de winter dy’t se yn de USA en Kanada hân ha. Sa as wy in jier lyn yn april noch hast alle moannen autoruten skrabje moasten, kin it dus samar dat dit jier yn novimber de wyn omheech giet en der in winter oankomt dêr’t je de tosken fan út de mûle klapperje. It mei fan my. Is ek folle better foar de ekonomy, want út in ferklearring fan immen dy’t der foar trochleard hat, die bliken dat der de ôfrûne winter folle minder gas ferkocht is. Dat soe wolris mei it waarme waar te krijen ha kinne, sa waard sein. Dus rôle der net genôch jild yn de goede rjochting.
It is ek noait goed. Ynstee fan dat de gelearden no ris bliid binne mei sa’n mylde, iepen winter, yn it ramt fan besparring op fossile brânstoffen, mar nee, dan smyt it wer net genôch op en sa komme wy net út de krisis.
2.
De organisaasje fan Kulturele Haadstêd 2018 siket in CEO. Dat is yn it Belgysk in ‘afgevaardigd bestuurder’, mar wy moatte it breder sjen en dus wurdt it in ‘Chief Executive Officer’. Dat is gjin Yndiaan, mar wol in persoan dy’t neffens de wurkomskriuwing en it frege profyl net bestiet. Gean mar nei, wa foldocht no op alle punten oan dizze profylskets? Ik sitearje, of better sein knip en plak:
Uw profiel
Ruime ervaring als bestuurder in een complexe bestuurlijke omgeving.
Affiniteit met kunst en cultuur en met de leidende thema’s in het bid book
Lwd2018: de relatie tussen cultuur en natuur, stad en platteland, diversiteit en Mienskip.
Ervaring met grootschalige transitieprocessen
Bedreven in omgaan met weerstand en bedreven in het creëren van ruimte
Bedreven in beleidsbeïnvloeding bij overheden, het maatschappelijk middenveld en het bedrijfsleven
Teambuilder, verbinder gericht op samenwerking
Uitstekend netwerker, kan gemakkelijk spreken in het openbaar
Hakt knopen door als het moet, maar kan het eigen ego ook opzij zetten voor het gemeenschappelijke doel
Internationaal gericht, Europees burger.
Goede beheersing van diverse talen. Tenminste Nederlands en Engels.
No bin ik fan natoere in tige posityf persoan. Mar dochs liket my it finen fan ien dy’t hjir yn past net al te maklik. Grut foardiel is wol dat hy of sy net Frysk prate, skriuwe of lêze kinne hoecht. Dat makket de fiver om yn te fiskjen al in stik grutter.
Wat hat it earste no mei it twadde te krijen? No, ien fan de beide beskreaune situaasjes stiet my net oan en jim meie riede hokker dat is. Foar minsken dy’t miene my goed te kennen liket my dat noch net iens sa simpel.