It wie juster in heuglike dei, Fryslân hat him sûnder oarlogjen ôfskaat fan de rest fan de wrâld. Wêr fine jo soks hjoeddedei noch?

Wy binne in eigensinnich folk sa liet de deputearre witte dat wy dogge hjir gjin punt-frl mar pompeblêd-frl. Dat is alderprachtichst want de winst sit him net allinnich yn de ôfskieding mar ek yn it feit dat de eigen taal yn de URL’s brûkt wurde kin. No noch in fatsoenlik toetseboerd sadat jo dat pompeblêd oanklikke kinne krekt lykas de Æ of æ.

Ik ha ek al berjocht fan myn provider hân en in domein reservearre. Gjin respons. Koste al € 2,50, mar dat jild wurdt foarsafier’t ik sjen kin net ôfskreaun fanwege it simpele feit dat my dêr net om frege wurden is.

Trochsette, dat doe ha ik in net neier te neamen klup opjûn as pionier. Der sil besjoen wurde oft dy net al te kriichshaftich en bolbjirken binne. Dy screening moat oant 31 oktober ta duorje.

Der sil wol gâns flecht op ’e koai wêze moatte jo rekkenje. De hjitting is dat wol 100.000 lju gading meitsje sille oan dit bloedferjitten. That’s cool.

De measten dêrfan sille wapenreau lykas guozzeroeren en sleien foar it ljocht helje dêr’t se dat pompeblêd earst mei trochboarje sa’t Grutte Pier dat noch never noait fertoand hat om it dêrnei o sa by de tiid sa’n grouwéligen dúst te jaan dat sels de strongest man fan Fryslân and ambassador fan Praat mar Frysk ‘oes Wout’ it op en draven set.

As dat hiele sirkus dan wat knap foar de hearen kommen is seit it himsels dat it sa mâl eins net moat en skeakelje se oer op it Bokwerters. De kontenerstikkers dy’t it net rjocht dwaan woene en no foar nix te krijen binne by dyselde jildslinende en – sa’t Lutz Jacobi ferline wike sei – bongeljende en tsierende ynstituten sille redesigned wurde: pompeblêden.

In lyts espeltsje folk – almeast beheind ta in hantsjefol skriuwers en bloggers – en in inkeld eigentalich blêd (ik kin allinnich Ensafh betinke) sille har ôffreegje hokker lân dizze wylde besetters har no yn efterlitten hawwe.

Se sille ferhûddûke wurde want fan dy neamden woe it grutste part fan ek al net meidwaan oan in nije stavering en mienden hja dwers troch alle positivisme hinne fêsthâlde te moatten oan in almost âldfrinzich ferskaat.

Wylst se wól – en dat raast echt oan de protters – allerhanne net-Hollânske wurden yn teksten begrieme om’t sa sa nedich ‘lêsber’ bliuwe wolle.

Mar se ha de slach ferlern, de Fryske wjergader fan it Esperanto is ynfierd en breed omearme: pompeblêd. Mei in .kul-ekstinsje der op ta.