‘Segen’ sil wol wer net goed wêze mar ús beppe wie in Wâldpyk en ik fyn dat wy har al wat yn eare hâlde moatte. Net dat ik fierder wat dan ek mar oan nijjier ôfwinnen dien ha. Gjin nocht oan.
Tsjintwurdich moatte jo jin foar sokke aksjes ôfjaan nei in feesttinte. No bin ik foar in soad dingen geskikt, mar dêr net foar. Jo moatte dêr stean, de drank wurdt net by jin brocht, raze mei buorman of –frou kin noch krekt, prate is ûnmooglik. Jo moatte de muzyk dy’t spile wurdt ferplicht moai fine en as klapper begjinne poerfrjemde lju jo oan de hannen om te skuorren of noch slimmer: it mindere slikwurk. It is in griis.
Sa’n tinte wurket as in magneet, dat sûnt in jier as wat set ik de konteners ek net mear binnendoar. Dat is gjin hint mar mear in utering fan begrutsjen. Doe’t wy noch jong en fluch wiene, moasten wy op sa’n nacht wol fyftjin oant tweintich adressen del. Almeast lju dy’t ús oanstiene. Wy krigen rûnom fergees bier, soms ek wol mear as ien!
Op ’e rûte namen wy fan alles mei dat net fêst siet. Miedemaweintsjes wiene net in soad fan, heaweinen wiene noviteiten dat wy toarken mei ûnbidige kipers om. As jo in bytsje manmachtich binne, slagget soks wol. Boaten diene it ek goed, benammen dyselden dy’t by gebrek oan wetter fan in ridend ûnderstel foarsjoen wiene.
‘As jim it foar jimsels mar goed krije kinne, dat getôch’, plichte beppe te sizzen. Pake fan de oare kant hie in grouwéligen hekel oan dy sleperij.
Mar dat hat allegearre west, wy geane nei ien standert. Anno 2015 dogge wy oan foarprogrammearring en is zappen ferbean. Sjen, harkje en frette wat de oer ús stelden goed achtsje. En dan makket it neat út oft it in minister of in nitraatbommebobo is. Se steane boppe ús en dan folgje wy. That’s it.
Ik wegerje dat en lei dan ek om 23.45 oere plat om de oare moarns frijwat senuweftige happes derfan te oertsjûgjen dat dit ûnfermogen net langer as twa dagen duorret. De earme dieren wiene de krystdagen better trochkommen.
Dagen dy’t yn it teken hearre te stean fan de berte fan Jezus. No leau ik dêr net oan mar as elk wakker fynt dat er om dy reden dan krekt as mei keningsdei frij ha moat fan de baas dan moatte se my der net mei oankomme om de winkels op dy dagen iepen te dwaan.
Gean nei it sirkus, nei de bioskoop, nei it teater of doch de famyljebesites. Mar sit net elk dy’t it ûngelokkiger treft as jin fan syn frije dagen te berôvjen! Unkristliker is amper yn te tinken, stel chipte konsumpsjegekken. As Maria dit sjen soe dan bekende se akút dat dy hiele grap mei dat bern in gefolch wie fan in lek kondoom.
Op earste krystdei heart it jongfolk moarns ier-ende-betiid de dyk út om ferskes te sjongen. Dat diene wy hjir foarhinne ek mar soks is fan de baan rekke nei’t de krystnacht wat tefolle beslach op it folk lei sadat se de oare moarns dat hiele ein net mear rinne koene en it idee ûntstie om mei in trekker sûnder útlit fan oarde nei oarde te reizgjen. Dat smiet fansels gâns oerlêst op mei as gefolch dat de selsbeneamde goaden dat trelit ferbean hawwe.
Mei’t se net langer segene wurde woene mei pinekop sadat der neat fan winkeljen en/of bierynslaan komme koe om’t se sa fan de mik wiene dat se in deade fûgel net fan in deade hazze ûnderskiede koene. En dat krekt op dy pear dagen yn it jier dat se har foardwaan koene as tige sûn libjende en PvdD-stimmende misliksma’s dy’t 363 dagen jiers oars net as ferkeard foer krije.
En de baas dus wiis meitsje dat se oan Jezus leauwe.
No, fertel dat de happes mar. As jim doare.