‘Koos van der Sloot makket keunst fan útsûgde aaien die’t er mei allerhanne objekten gearfoeget ta assemblaazjes. Byldgedichten, sa soe men se neame kinne.’ (Huub Mous)

(foto: Linus Harms)

Op de boppesteande foto is it keunstwurk ‘sonnet’ fan Koos van der Sloot te sjen, it is in ‘byldgedicht’, yn dit gefal in ‘byldsonnet’. Elk aai stelt in wurdlid foar, in lossteand aai is ien wurd, tsjininoaroan pleatste aaien foarmje in wurd fan safolle lidwurden as der aaien tsjininoaroan stean.

Skriuw in sonnet op…

ensafh noeget elkenien út om it ‘byldsonnet’ fan Koos van der Sloot om te setten yn in ‘wurdsonnet’, folslein neffens Van der Sloot syn skema, dat wol sizze hast folslein. Wat by it skriuwen fan it sonnet net as eask steld wurdt is dat ek krekt it skema fan ûnbeklamme en beklamme wurdlidden folge wurdt sa’t dat troch Van der Sloot oanjûn is troch de aaien mei de punt nei ûnderen (gjin klam) of de punt nei boppen (klam) te pleatsen. Boppe it gedicht stean twa aaien, dy stean fansels foar ‘sonnet’, de titel, mar de titel dy’t jo oan jo gedicht jaan wolle hoecht net perfoarst út twa wurdlidden te bestean. De fjouwer aaien ûnderoan it sonnet stean foar de namme fan de auteur, yn dit gefal Koos van der Sloot. Dêr kin men dus gewoan jins eigen namme foar yn it plak sette. De ynstjoerde wurdsonnetten (stjoere nei: redaksje@ensafh.nl) sille pleatst wurde op ensafh, de auteurs krije der in passend kado foar.

Utstalling
Yn it Natuurmuseum Fryslân yn Ljouwert is fan 20 novimber oant en mei 17 jannewaris Koos van der Sloot syn debútstalling Bal masqué te sjen. It boppesteande ‘aaisonnet’ is dêr dan faaks yn it echt te bewûnderjen. Sjoch fierders ûnder de rubryk aginda fan ensafh.