It antwurd op alles

‘We einigje allegearre yn in houten jurk.’
Menear de Strjitfeier.

In soad minsken kinne it net stelle sûnder antwurden. Dêrom leaut de ien en ûndersiket de oar. En mar diskusjearje. Lokkich is der in alternatyf.

Fuck it. Sprek it mar ris foar jinsels út: ‘Fuck it.’ Net dimmen, mar mei fierens en foldwaning. Der heart jin fuort nei it útsprekken in glim om ‘e mûle te kommen, dy’t je net sels meitsje, mar dy’t út it boarst opluchtet as ferlichting. Fiele je it? No, priizgje dan jinsels, want je hawwe it antwurd fûn op alles: fuck it.

Dit heechsteande ynsjoch ljochte op út de film The Big Lebowski, yn ’e dialooch tusken twa manlju mei de bertenamme Jeffrey Lebowski. De iene sit yn in karke en is stjonkend ryk, wylst de oare as gefolch fan firtuoaze loaiens sa earm is as in lús. Se wurde it net iens oer in kwestje oangeande it flierkleed fan de loaie. Op in stuit hat de loaie it hân mei it praat fan de rike. Hy komt oerein om fuort te gean en seit: ‘Fuck it,’ wêrop’t de rike him neiraast: ‘Ja, Fuck it, dat is jimme antwurd op alles! Tatoeëarje it mar op dyn foarholle!’

Dizze útspraak is fansels reaksjonêr bedoeld, mar as we tsjin dat gegeven ‘fuck it’ sizze, dan bliuwt der in geweldige definysje fan ‘fuck it’ oer, wêrmei’t de útdrukking fuort yn in metafysysk perspektyf pleatst wurdt. As eat de muoite net leannet, dan kinne je dêr de skouders oer ophelje. Der binne mear wegen nei Rome en boppedat kinne je ek earne oars hinne. Wat jout it.

We einigje allegearre yn in houten jurk.

(klik hjir foar De bollesesjes 1)