“Ist das Schwein?”
Andrzej, 2016

Wa’t tinkt betinkt net wat er tinkt. Hy observearret.

Yn in âld pleatske tusken de Vecht en it Amsterdam-Rijnkanaal sit in lyts frommeske fan Sina oan ’e keukenstafel te iten. Lasagna. In grutte en lompe Poalske sumowrakseler bûcht him mei in heale literblik mei bier yn ’e mânske klau oer de tafel en sjocht ris op har itensboard.
‘Ist das Schwein?’ wol er witte.
It Sineeske famke – in operasjongeres – kin net ferstean wat er seit. Se seit dêrom mar fan ‘yes’.
Us Poal dan, suchtet fan ferromming.
‘O, glücklich,’ seit er, ‘ich dachte du warst ein Asylanfrager.’ *

No, tocht ik, doe’t dizze skiednis my meidield waard, dat bewiist mar wer hoe bysûnder de minske is. Guon fan ús kinne alles noch sa moai yn kranten, boeken en taspraken útiensette, it sil net helpe. Om it tal hûzen sil altyd wer sa’n rjochtoprinnend wêzen – dat de Sinezen allinne om dy eigenskip net ite – dingen sizze dy’t út syn ratio wei opborrelje, mar tusken oerflak en wolkens it stal krije fan eat dat fysiologysk ûnmooglik liket en der dochs is.

Sokken tinke net, se betinke. En sokken hawwe net altyd it uterlik fan in hompe mei in blik bier. Se rinne ek om yn pakken dy’t jûns noch skjin binne. Dan hawwe se de opdracht krigen om te betinken wat de ynkommeling leare moat by in ynboargeringskursus, en dan dogge se dat.

Paulus traktearret op it wurk op leverwoarst. Mohammed nimt in stikje. Wat docht dat mei Paulus?

a) Paulus kriget erch
b) Paulus is bliid
c) Paulus moat gûle

* Foar dizze man is in ‘Asylanfrager’ synonym oan ‘moslim’.