Minder ite, mear bewege: dat is tsjintwurdich it biedwurd fan de oerheid om de al mar fetter wurdende Nederlanner ôfslanke te litten. No bin is sels (noch) net te swier, mar omdat ik op it wurk foaral achter it buro sit, de tsien minuten dy’t ik nei it wurk fyts gjin namme ha meie en ik sa no en dan dochs in ekstra fetroltsje mien op te merken, fiel ik my hieltyd mear oansprutsen troch de oanhâldende oerheidskampanje. Dikke minsken wurde dêryn boppedat sjoen as in steltsje losers en dêr wolle jo fansels net by hearre.
Minder ite en mear bewege dus. Minder ite is net sa’n probleem fanwege myn groanyske read stean healweis de moanne, soms sels al oan it begjin fan de moanne. Sadwaande bin ik geregeld feroardiele ta in dieet fan wetter, bôle en soms in sinesappel om skuorbûk tsjin te gean.
Mear bewege is wat dreger te realisearjen. De measte minsken yn myn posysje melde har oan by in sportskoalle. Dat ha ik dus ek mar dien. Soks moatte jo net te bernich oanpakke, direkt in abonnemint fan twa jier, want behalve dat dat goedkeaper is, giet it hjir om in serieuze feroaring fan libbensstyl. Net eat dêr’t jo nei in heal jier alwer mei ophâlde.
It aardige fan de sportskoalle is, is dat der altyd minsken omrinne dy ‘t der noch beroerder oan ta binne. Fan dy types dy’t by it ôfgean fan de traap nei de seal al it swit op de holle ha, de swiere gefallen sa sein. Mar der rinne ek fan dy ôftreende figueren om dy ‘t sûnder iennige muoite in heal oere yn heech tempo op de loopband drave sûnder dat se ek mar in bytsje hymje. It is frij frustrearjend om neist sa’n ien te draven. Ik kin nei trije minuten al kwalik mear sykhelje, lit stean prate, wylst sa’n persoan neist my freonlik freget hoe ‘t it giet. Foar de sosjale kontakten hoege jo yn alle gefallen net nei de sportskoalle: of josels of de oar hat gjin adem om it pratende te hâlden.
Wat ek helpt is de auto nei de garaazje bringe at der in soad oan dien wurde moat en der gjin lienauto foarhannen is. Soks it leafst flak foar it wykein. Dan stiet dy auto dêr moai in pear dagen. As echte bikkel nim ik dan fansels de fyts om sneintemiddei even by ús mem op besite. De bus is ommers sa’n gemiter en duorret ek noch hopeleas lang. Boppedat ha ik dy tolve kilometer tusken myn tolfde en myn achttjinde sawat eltse dei fytst, dus dat moat no ek kinne.
Dat falt dus ôf, net allinne is de tiid dat ik sawat fjouwerentwintich kilometer deis fytste al dik tsien jier lyn (om it even nei ûnder ôf te rûnjen), mar bin ik om it sa te sizzen, fan marathonrider, sprinter wurden. Al dy lytse stikjes troch de stêd kinne jo maklik op topsnelheid ôflizze, mar op langere ôfstannen wurket dat net. Ik gong dy bewuste snein dus flot út de startblokken. Flink tempo, net eamelje, it moat noch altyd yn sa’n trije kertier te dwaan wêze. Healweis wie de feart der aardich út, sadanich sels dat ik ynhelle waard troch in fitte fiifensechstichplusser. Ik moat der wol by sizze dat dy in moaiere fyts hie as ik. Net tajaan wolle dat ik de ein yn ’e bek hie, fytste ik nei dat barren fanatyk troch. In oere letter ried ik úteinlik it hiem fan ús mem op. En dan moat je ek noch werom.
Al mei al wie ik dochs aardich tefreden oer myn beweging. It wie gewoan in kwestje fan trochsetten. Noch in pear kear op ’e fyts ynstee fan mei de auto, hieltyd wat langer en flugger folhâlde kinne op de loopband fan de sportskoalle, dat alles soarge foar in saneamde ‘succesbeleving.’ Oant ik ferskriklik lest krige fan myn foet. Net te gau piipje ha ik fan thús leard, dus earst mar even tosken op elkoar en trochgean. Nei alle gedachten giet it fansels oer. Dat wie net sa. Ik rekke fia de húsarts yn it sikehûs. ‘Overbelasting’ konkludearre de arts. ‘Ontsteking door overbelasting. U moet zeker enkele maanden rust houden, vooral omdat u er veel te lang mee rondgelopen hebt.’ Dêrby seach er my oan sa ‘t allinne artsen dy oansjen kinne: mei berêstend ferwyt. Ik kromp yn elkoar fan skuldgefoel. Dus no lis ik mei in blessuere op ‘e bank en myn auto brûk ik no ek foar de lytske stikjes yn ’e stêd. Wat soe Al Gore dêr wol net fan sizze? Je kinne it gewoan net goed dwaan.