Syds Wiersma reizge dizze simmer troch Ierlân om dêr in dichtbondel te
skriuwen. Yn 2019 makke er in begjin mei dit projekt. Guon fersen ferskynden
koartlyn yn Ensafh 3 en 4.
It gedicht ‘Saint Brendan’ ûntstie nei de beklimming fan Mount Brendan,
in berch oan de westkust fan it Ierske skiereilân Dingle.
Neffens de tradysje liede Brandaan (c. 484 – c. 577) dêr in
kleastermienskip en boude er by in ynhamke oan de foet fan dy berch syn
currach-achtige boat dêr’t er jierrenlang mei in groep muontsen en in
pear ûnleauwigen mei op de Atlantyske oseaan omswalke.
Saint Brendan
Dingle, Brandon Creek
In bytsje as wekker wurde út in boartlike
dea, de kleare stilte dêr’t ik yn ôfdaal. In
skym fan de Blaskets krûpt út de
fingerseinen fan myn útsicht. Troch blêtsjende
djipte kom ik sodzjend oan yn in wrâld fan
wosken lûd: ûnderguod en bh’s wapperje
oan linen tusken de laaiplatte huzen. In
waakse hûn wit dat dit oars is, ik gjin
thúskommer bin mar trêdzje mei it revolver
fan it ôfreizgjen yn ’e rêch. It wylde read fan
fuchsia’s yn de hagewâlen, de risselhantsjes
fan rintfear, it mûlefleis fan toarnbei. Oant ik
der bin, in skraal limbus mei inkeld
wettertaal. Dit is in klompehok foar de see.
Hjir skopst dyn fuotark út en wriuwst it
brânen út hakke en krop, mei ien skonk al
yn de bek fan it meunster dat alle
bestimming oermânsk my ropt as in
wrinzgjende skoat. Hjir klaut dy de lange neil
fan de oseaan en moatst muontseftich
ôfrekkenje mei dyn neakene eangst.
Hoi Syds,
Moai fers, jonge! En foar my tige werkenber.
Yn july 2013 haw ik nammentlik ek yn dy kontreien omswalke. Myn frou, sweager, skoansuster en ik diene doe, rinnenderwize, in lange slach om it Dingle Skiereilân hinne en hawwe ek iten en oernachte yn O’Connor’s Guesthouse oan ‘e Brandon Bay yn Cloghane. Dêr wie dy jûns allerprachtichste live-muzyk (dêr’t ik my benammen om te rêden wie!).
Sjoch ek myn artikel op/yn https://www.ensafh.nl > Auteurs > Auteurs N o/m S > Oosterhaven. Beart > 13 oktober 2013: ‘”Friersk”, in fenomenaal goed album!’
Mei freonlike groetnisse,
Beart Oosterhaven
http://www.omropfryslan.nl > PODCAST > Noardewyn de Podcasts > Keale Koppen
Hoi Syds (en oare lêzers fan ditte),
Ik bin oan nije glêzen yn myn bril ta!
Dêr’t yn it boppesteande yn ‘e rigels 3 en 9 it jiertal 2013 stiet, moat dat fansels 2018 wêze.
En yn rigel 9 moat ‘ik’ wêze: it.
Mei freonlike groetnisse,
Beart (dy’t om in nije bril út sil)
Ha Beart, dankewol, it is op ‘t stuit wat skraler mei de live muzyk yn de pubs yn Ierlân, al begûn it yn augustus wer in bytsje op gong te kommen. Cloghane is my wol bekend, in re-migrearre Ierske Amerikaan joech my der op in sneintemoarn in lift hinne en ik moete dêr by O’Connor’s in frou út Tralee dy’t harsels in ‘couch potato’ neamde en mei wa’t ik dêrnei it earste ein oprûn foar’t se it paad troch de bergen nei Brandon Point naam. Ik haw de cd fan Chris Kalsbeek daliks besteld, ta myn skande hie ik dy noch net. Groetnis, Syds