Och Kobussy,
ús lytse Gasterlanner
Debussy fan it wurd,
sa gie it hurd
en wiest der al net mear,
mei dyn Quingo ôfslein
nei leanen fan de Hear.

Dyn Q
klonk altyd better
en leuker benammen
as wat de hoanne moarns
al kukeljend bestammere
doe’t Petrus Jezus miskend hie
en de Minske nei de geast
ûntmanne.

Der wurdt ferteld
datsto hjir wiest
mei dyn scootmobyl yn Sleat
en op ’e sydkant rekke bist.
It trotwaar hjir
hat ferrifeljende bannen.
Ik wist fan neat,
ast dat mar witst.

No Kobussy,
do lytse Saint-Exupéry
fan alle wiere poëzy,
krij dyn wurd op en riis
prinshearlik
troch it loftferkear
nei paradizen fan alear.

Sleat, 1 febrewaris 2024

Noat: Op in sneontemiddei doe’t ik op Urk nei it fuotbaljen wie, is Jacobus hjir by ús de Menno van Coehoornstrjitte yn riden mei syn scootmobyl yn folle bepakking. Nei alle gedachten is er sa it trotwaar op stood en oer de weareld rekke. Minsken fan de buert alarmearden Lienke want de man hie it oer Eppie Dam. Lienke hat mei him praat, sein dat ik der net wie, en Jacobus fertelde syn boadskip: hij brocht allinnich mar in pasfoto fan himsels.
Ik ha noch in subtile link lein tusken Hjir en Trotwaer, dêr’t ik redaksjelid fan wie. Dat stie noait tusken ús yn want dichters ha mear mei wurden as mei nammen.
En Debussy sil yn ’e komponistehimel wol even fan plak ferskood wêze om de synkopise knoop yn syn namme.

Eppie Dam