In bytsje keunstner hat fansels in krupsje dy’t him, har, of it, yn ’e wei sit. No haw ik der noch hieltyd muoite mei om mysels KEUNSTER te neamen, mar ik haw al in krupsje dy’t my op dit stuit behoarlik yn ’e wei sit. Efkes kort troch de bocht: ik haw in gat yn it tromflues fan myn rjochterear en bin der ek aardich dôf oan. No wolle jimme witte: hoe is dat kaam Feddema? Of net, kin ek no? Net fierder lêze dan, mar dan misse jimme al in ‘ûngelokken-yn-en-om-it-hûs-horrorferhaal’. It wie freedtemoarns, njoggentweintich novimber, op myn atelier. Ik wie hiel betiid al yn ’e sportskoalle en hie dêr ek dûst. Der siet miskien in bytsje wetter yn ’e earen, dus efkes noflik mei in wattestaafke omgrieme. Dêr’t iderien fan seit: net dwaan … sa as wy allegear hiel goed witte. Hie ik no gewoan sitten bleaun of stilstean, dan wie der grif neat bard, mar nee hear … menear hie de ridel yn ’t gat en rûn drok hinne en wer, want dy jûns presintaasje fan in koart ferhaal, ferskynd by útjouweij Perio. Bytsje drok yn ’e holle dus, want der moasten noch ferskate saken klear.
Ik rin fan myn atelier nei it oare hûs (wy hawwe twa wenten neistinoar, witte jimme dat ek wer) – wat ik dêr no moast, wit ik net iens mear – en rin wer werom … ik knal mei myn harsens tsjin in tuskenskotsje, meitsje in skrikbeweging en bats mei myn rjochter earmtakke tsjin it lewant en hoppa … de hân mei it wattestaafke – al yn it ear begripe jimme – krijt in bêste oplawibus, kringt djip yn it ear troch en jout in koarte, hiel skerpe pine en ik wit: MIS!
Ik bin der fuort ôf en dat duorret in aardich skoftke fan dy dei; je moatte domwei wenne oan de nije realiteit. De presintaasje dy jûns gong nammers toppiejoppie, dêr net fan, mar ik hearde alles mar toch ien ear. Ik haw alles ek mar ferteld oan ’e minsken dy’t der wienen … je binne in ferteller of net, no?
Ferline wike nei dokter west en dy sei: in gat … oer tsien dagen wer komme. Dat is moarn. Op it stuit rint der in soad focht út, in ferskynsel dat derby heart – ek efkes op ynternet socht – en it moat út himsels wer oergean, mar de klachten kinne wol twa, trije moannen oanhâlde. As der no noch mei âld en nij in stik fjoerwurk tsjinoan komt, dan bin ik Goya en van Gogh yn ien persoan … No lêzers, in noflike Kryst en in lokkich nijjier en … sûn bliuwe.